Театр «Саби»-йы ацыдысты дагестайнаг куклаты театры гастрольтӕ

Дагестаны куклаты паддзахадон театр «Саби»-йы сценӕйыл равдыста спектакль «Красавица и Чудовище». Ӕвӕрд у Жа́нна-Мари́ Лепре́нс де Бомо́ны аргъаумӕ гӕсгӕ. Сӕйраг рольтӕй иу ахъазыд Дагестаны адӕмон артисткӕ Екатерина Касабова. «Царды ӕз хӕларзӕрдӕ адӕймаг дӕн, уымӕ гӕсгӕ мын ацы фӕлгонц хӕстӕг нӕу. Фӕлӕ сарӕхстӕн, ролы бацыдтӕн ӕмӕ йӕ стыр ӕхсызгонӕй ахъазыдтӕн. Уæвгæ, кӕддӕриддӕр зӕрдӕрухсӕй фӕхъазын». Ацы спектакль сси дагестайнаг коллективы гастролон программӕйы хай. Сюжетмӕ гӕсгӕ чызгӕн йӕ бон бацис, тызмӕг бакасты фӕстӕ цы хæлар зæрдæ ис, уый фенын. Уацмыс сывӕллӕттӕн ӕвдисы ӕргомдзинад, стӕй зӕрдыл ӕрлӕууын кӕны, адӕймаджы миддуне ӕддаг бакастӕй ахсджиагдӕр кӕй у, уый. «Хӕларзӕрдӕ хъайтары ахъазын зындӕр у ӕвзӕргӕнӕджы ролæй. Бель-ы хуызӕн дӕн, уый зӕгъын мӕ бон нӕу, фӕлӕ йӕ фӕлгонцмӕ стыр цымыдисӕй бавнӕлдтон. Ацы аргъауы алцыдӕр цардӕй ист у: уарзондзинады æнкъарæнтæ алчидӕр бавзæрста, ӕрмӕст сæ ӕрымысын ӕмӕ сценӕмӕ рахӕссын хъӕуы». Зындгонд сюжетмӕ ног хуызы бакаст режиссер Олег Жю́гжда. Театрдзаутӕ саргъ кодтой спектаклы ӕнахуыр декорацитӕн, музыкӕйӕн ӕмӕ иумӕйаг уддзӕфӕн. «Спектакль ӕвӕрд у готикон стилы. Нӕ фӕндыд ирон кӕсӕгӕн ӕнахуыр равдыст ӕрбаласын. Ныгуылӕн европӕйаг сюжеттӕм гӕсгӕ нӕм аргъӕуттӕ ис, фӕлӕ ахӕм хуызы — нӕма. Рауад цымыдисаг, хуызджын ӕмӕ ирд». Гастрольтӕ цӕуынц «Кукольная карусель Кавказа» проектмӕ гӕсгӕ. Октябры театр «Саби»-йы труппӕ Дагестаны равдыста Нелли Осиповайы пьесӕмӕ гӕсгӕ æвæрд спектакль «Абрикосовое дерево». Ахӕм гастрольты фӕрцы ӕвзонг театрдзаутӕ базонгӕ вӕййынц сыхаг регионты аивадимӕ. Уымӕй уӕлдай, фидар кӕнынц культурон бастдзинӕдтӕ.