Мæскуыйы ахуыргæндты хæдзары ацыд Абайты Васойы историон-этимологон дзырдуаты тæлмацгонд презентаци

Мæскуыйы ахуыргæндты хæдзары ацыд Абайты Васойы ирон историон-этимологон дзырдуат англисаг æвзагмæ тæлмацгонды дыккæгæм том æмæ йæ электронон хуызы презентаци. Мадзалы бацархайдтой наукæйы архайджытæ, Мæскуыйы ирон æхсæнады уæнгтæ. Проекты амидингæнæг у зындгонд дохтыр, медицинон наукæты доктор, профессор Торчынты Амырхан. Абайты Васойы ирон æвзаджы историон-этимологон дзырдуат у ахуыргонды агъаудæр куыстытæй иу. 5-томон рауагъды ахадындзинад абон дæр аргъ скæнæн зын у. Уæвгæ, йæ фыццаг том рухс федта æнусы 'мбисæй раздæр. Æмæ ныр дæр у ирайнаг æвзагзонынады къабазы раззагдæр чингуытæй иу. Мæскуыйы паддзахадон университеты доцент, зындгон ахуыргонд, лингвист Олег Беляев Ирыстоны бауарзта студент уæвгæйæ. Ныр бирæ азты дæргъы ахуыр кæныирон æвзаг. Æмæ йæ сæйрагдæр чиныг у Абайты Васойы куыст. 2019-æм азы Олег Беляев Мæскуыйы æмæ Цæгат Ирыстоны паддзахадон унивеститетæй йе 'мкусджытимæ райдыдта Абайты Васойы дзырдуат англисаг æвзагмæ тæлмац кæнын. Уыимæ ма дзырдуаты бындурыл арæзт цыд электронон базæ. Суыдзæн ахсджиаг фæрæз наукон иртæстытæн, æххуыс уыдзæн ирон æвзаг ахуыр кæнын кæй фæнды, уыдонæн. Ацы бонты та Мæскуыйы Ахуыргæндты хæдзары ацыд дзырдуаты дыккаг томы æмæ йæ электрон хуызы презентаци. раныхас дзы кодта проекты амидингæнæг - медицинон наукæты доктор, профессор, Уæрæсейы, Цæгат æмæ Хуссар Ирыстоны сгуыхт дохтыр, Мæскуыйы ирон æхсæнады хистæрты советы сæрдар Торчынты Амырхан. Видеобастдзинады руаджы Неаполæй архайджытæн раарфæ кодта зындгонд италиаг ахуыргонд профессор Адриано Валерио Росси. Мадзалы ма бацархайдта Уæрæсейаг наукæты академийы скæсæйнаг бæстæтæ иртасыны ахуырады институты директоры хæдивæг Александр Скаков, Археологийы институты секторы разамонæг Дмитрий Коробов, Дзæуджыхъæуы Наукон Центры скифаг-алайнаг иртæстыты центры разамонæг Сæлбиты Тамир, стæй Хуссар Ирыстоны паддзахадон университеты доцент Дзиццойты Юрий. Тæлмацæн æмæ мыхуырæн æхцайы фæрæзтæ æрæмбырд кодтой не 'мзæххонтæ — Мæскуыйы ирон æхсæнады уæнгтæ. Абайты Васо цы бындур ныууагъта, уымæн ис стыр зонадон нысаниуæг. Ирон æвзаджы историон-этимологон дзырдуаты бындурыл электронон ресурс кæй æрцыд арæзт, уымæн та уæлдай ахсджиаг у ныры дуджы. Æхсызгон ма ма уый у, æмæ ирон æвзай уарзын æмæ йын аргъ кæнынц æнæхъæн дунейы дæр. Мы рядом в: ok.ru/irystontv https://youtube.com/irystontv zen.yandex.ru/irystontv