Дохтыртæ фæдзæхсынц гриппы профилактикæ рагацау æххæст кæнын

Хуыфæг, бæрзонд температурæ, æхснырсæг æмæ хъуыры рыст. Грипп, вирусон низтæ æмæ COVID-19 уæлдай парахат вæййынц фæззæг æмæ зымæджы. Дохтыртæ фидарæй зæгъынц, уазæлтты "хæлæрттæй" хи бахизæн ис, рагацау прививкæ куы скæнай, уæд. Прививкæ чи скодта, уыцы пациенттæ инфекцион низтæн хуыздæр быхсынц. Грипп æмæ æхснырсæгæй та цыбыр рæстæгмæ адзæбæх вæййынц. Фæлæ вакцинæ скæныны размæ хъæуы дохтыры консультаци ацæуын, уымæн æмæ йын бæлвырд амынддзинæдтæ ис. Уæлдай цæстдард домынц сывæллæттæ æмæ хистæр кары адæм. Уыдонæн тæссагдæр у алыхуызон вирустæй. Вакцинацийы фæрцы ис низтæй хи бахъахъхъæнын. Фæлæ иммунитет фидар кæныны тыххæй дæр рох кæнæн нæй. Дохтырты амындзинадмæ гæсгæ, къаддæр цæуын хъæуы, адæм бирæгæйттæй кæм æмбырд кæнынц, ахæм бынæттæм. Фылдæр тезгъо кæнын сыгъдæг уæлдæфмæ, дон арæхдæр нуазын, пайда кæнын дыргътæ æмæ халсартæй. Абон республикæйы эпидемиологон уавæр тæссаг нæу. Уæрæсейы фæлхасгæнджытæм цæстдарды управлени фæдзæхсы скъолаты, сывæллæтты рæвдауæндæтты, медицинон æмæ социалон кусæндæтты профилактикон мадзæлттæ фæтыхджындæр кæнын. Специалисттæ зæрдыл лæууын кæнынц: æнæниздзинадмæ лæмбынæг цæстдард æмæ афойнадыл медицинон æххуыс къаддæр кæнынц низты парахат.