ЦИПУ-йы биотехнологтæ кæнынц иртæстытæ фæткъуыйы хæйттæй пектин

Фӕткъуыйы дон уадзыны фӕстӕ баззайы цъар, зыгуым ӕмӕ дыргъты ӕндӕр хӕйттӕ. Нымад цæуынц пайда цæмæй нæй, ахæм фæрсаг продукттыл. Фæлæ сæм Цæгат Ирыстоны паддзахадон университеты ахуыргæндтæ сфæнд кодтой æндæр цæстæй æркæсын: сбӕрӕг кӕнын, пектин — хойраджы промышленностӕн зынаргъ компонент дзы сисæн ис æви нæ. Пектинӕй пайда кӕнынц алыхуызон продукттӕ аразгӕйӕ. ЦИПУ-йы кӕсынц цыхтахсынмӕ. Специалистты ныхӕстӕм гӕсгӕ, уӕлӕмхасӕнӕн йӕ бон у ӕххуыс кӕнын продукты уымӕлад уромынӕн, йӕ структурӕйыл ахадынæн ӕмӕ цӕттӕ цыхты рацыд фӕфылдӕр кӕнынӕн. Уымӕй уӕлдай пектин зындгонд у йӕ пребиотикон миниуджытӕй. Фӕлӕ продукт райсыны архайд у бирӕкъабазджын, домы фыдæбон. Фыццаг фӕткъуыйы хомаг туаг гидролизӕй байсӕрдынц, уый фæстæ цы змӕст райсынц, уый ссыгъдӕг кӕнынц ӕмӕ йӕ фильтр кӕнынц. Алы къӕпхӕн дӕр ахсджиаг у, цӕмӕй фӕстагмӕ рахицӕн кӕна буаргъӕд ӕмӕ йын раиртаса йӕ миниуджытӕ. Ацы куыст кӕнынц системон экологон анализы лабораторийы специалисттӕ. Иртасӕн куыст цӕуы хойраджы технологийы кафедрӕйы ӕмӕ ЦИПУ-йы системон экологон анализы лабораторийы иумӕйаг проектты фӕлгӕты. Республикӕйӕн ахӕм бакуыст уӕлдай ахсджиаг уыдзӕн. Биотехнологты фӕнды æрмæст бынӕттон хомагӕй пектин райсын нӕ, фӕлӕ ма сбӕлвырд кӕнын, хойраджы куыстады дзы цас ахадгӕ пайдагӕнӕн ис, уый дӕр. Фидæны уый фадат ратдзӕн фӕткъуыты бакуысты фӕрсаг продукт парахат æмæ хъугæ скæнынæн.